База на податоци за згради, фасади, скулптури, споменици, фонтани и други видови објекти финансирани од јавни пари, кои го сочинуваат новиот лик на Скопје.
Зградата на Уставниот суд, Државниот архив и Археолошкиот музеј со елементи на античката архитектура и класицизам стана една од најпрепознатливите објекти на „Скопје 2014“.
Нејзината изведба беше во надлежност на Службата за општи и заеднички работи на Владата.
Таа се градеше подолго од 4 години и за неа се потрошени над 42 милиони евра, што новото седиште на Уставниот суд, Државниот архив и Археолошкиот музеј го прави најскап објект изведен во рамките на владиниот проект.
Зградата со приземје, седум ката и поткровје која се простира на површина од 13.510 метри квадратни, требаше да биде готова во јули 2011 година, но првите станари, Уставниот суд и Државниот архив, во неа се вселија во 2013 година.
На свеченоста присуствуваше и премиерот Никола Груевски кој рече дека станува збор за капитален објект „во историски стил и раскошна архитектура“.
Токму архитектурата на објектот е една од точките на критиката која ја оспорува неговата местоположба на левиот брег на Вардар, како и тоа што раскошната фасада не кореспондира со големината на зградата чијашто широчина е 15-тина метри.
Автор на идејното решение е архитектот Слободан Живковски.